Teichland: Bärenbrücker Höhe

& 858 & 11:16 - 17:15

EEEEEEEEEEEEENDLICH URLOOB!!! Wurde abor och Zeid! Schbreewald - ich komme!
Den ganzn Dooch had ich mich off dor Bärnbriggor Heeh rumgedriggd un mid der BäHö-Runde gegämbfd. Da wurde eem einiches abverlangd, wenn mor da den Ieborbligg behaldn wolld. Abor ich hadde mich dabfor geschlaahn un sogor noch diese Runde hior "neembei" mid bewäldschd

Sdäidsch 1: Da mich schon beim Offschdiesch un bis hiorher so einiche Dosn un massich Buchführung offhield, orreichde ich diesn Rasdbladz erschd, da war schon fasd Middsch. Un hior gab's schah zu so einichn Gäschs was zu dun. Da war es schon driggie, hior den Ieborbligg zu behaldn, für welchn Gäsch welsche Info zu nodiorn is. Hior fand ich die Offgaamschdellung abor sehr indressand un orgloom die Bladdform. War ich doch ma geschbannd, ob das so risch gidd mid der Gradbeschdimmung. Mid modernsdor Dechnig un Ooche zamgneifn un "noch-ma-genauor-ausrichdn" kam ich dann och off nen annehmborn Werd. Ich meen, mid Bligg off die Endraachnung mussde mor doch och ne ganz so genau sein, wie es eeschndlich gefordord war Da laach ich eeschndlich in nem Bereich der durchaus Sinn orgab un für mich als felsnfesde Wariable schdand, an der's och nüschd zu rüddln gab. Ich fühlde mich hior eeschndlich sehr orfolgreich in dor Wariablenormiddlung un daß nich nur bei diesm Gäsch hior. Abor dor Dooch is noch schung un dor Kobbwendilador sorschd noch für enn fungdschonsfähsches Geherne

Sdäidsch 2: Dies hädd ich och noch an diesor Rasdschdädde gesaachd, abor froh war ich schon übor die Meeschlichkeed, mich ma zu in dn Schaddn zu hoggn un ma ne kleene Bause zu machn Middlorweise schdand die Sonne risch hoch am Himml un es war schon edwas nach Middsch un die rische Zeid für ne Bause. Bis hiorher war ich dann doch schon ganz scheen ins Schwidzn geradn un mei Kobbwendilador zeischde erschde Ormüdungsorscheinung Un dann noch die hior geschdellde Offgabe Hior mergde ich erschdema, wie ald der Gäsch eeschndlich is Da war die Wariablenfindung schon gor ne mehr so eefach. Offn erschdn Bligg sah ich den Findlingshaufn im hohn Geschdrübb gor ne un als ich ihn dann endlich enddeggd hadde, war es nochma so schwer, diesn von alln Seidn zu begudachdn Ich gämbfde mich zwar reedlich durchs Unnorholz, um och ja von alln Seidn alle Schdeene zu sehn, abor bei diesm Gambf hadde ich wo edwas den Ieborbligg verlorn, denn lezdlich war es diese Schdadschon un Wariable "B", an der ich bei dor Finalraachnung gescheidord bin un mir nichma enn Delefondschogor weidorhelfn konnd, denn der hadde och widdor ne ganz annre Anzahl gezähld un nodiord Wie der ledzdlich den Dscheggor grien gegrischd had, weeß ich ne - ich nur mid ausreichnd Gwälorei. Ich gloob, die Schdadschon is och ne mehr annorsch zu bewäldschn, als mid "schädzn-sie-ma" Da war es schon gudd, daß dor Ounor hior zur Sischorheed nen Dscheggor eigebaud hadde. Odor doch ne? Ich meen, am Ende habsch am Feinl och so ewich gesuchd, da häddn meine ee zwee zu wenich gezähldn Schdeenln och ne sooooo viel dran geändord. Abor für mich, als Berfegdschonisd, die's och immor ganz genau wissn will, war der Dscheggor schon ne feine Sache Hior könnd dor Ounor allordings bei seim nägsdn Gondrollgang die Axd odor Modorsense zur Offfrischung diesor Schdadschon midnemm

Sdäidsch 3: Bis zu diesor Schdadschon war es dann schon reichlischor Nachmiddsch gewordn, dor Kobbwendilador in de Gnie gegang un ich gämbfde nu zusehns middor Hidze un der Schwemme der Gäschs un die damid verbundne Buchführung. Middlorweile kamndn dann och so langsam die Endberaachnungen für diwerse BäHö-Bonüsse dazu, die mei Geherne bei der Hidze echd zum Gochn brachdn Da war die hior geschdellde Offgabe doch ma risch endschbannd un konnd sogor im Schaddn vorgenomm wern Also wurde nach widdor langm Marsch hior glei widdor enn Bäusl eigeleeschd Insofern had sich der Abschdeschor von der BäHö-Runde hiorher mehrfach gelohnd. Er zeischde nämüsch och nen indressandn Ord, an dem mor so villei vorbeigerannd wär (so off die BäHö-Dosn gonzendriord ). Durch die Hidze war ich zwar erschd edwas oriendierungslos un fand den besaachdn Boom ne glei, abor dor Schaddn loggde mich dann in die rische Richdung Mid der hior ormiddldn Informadschon war ich mir dann widdor felsnfesd sischor

Sdäidsch 4: Bis hiorher hadde ich erschd noch den ausschweifndn Weesch übor die resdlichn BäHö-Dosn im Südn genomm un befand mich nu schon off dem abschließndn Gringl der BäHö-Bonüsse. Dabei lengde ich meine Schridde och hior lang.
Das Bauwerg war schah schon von Weidm sichdbor un hadde mich off dor heidschn Runde schon mehrfach angelachd un mir zugezwingord. Abor erschd am schbädoren Nachmiddsch folschde ich diesor Offfordrung. Middlorweile haddn sich n boor Wolgn vor die brennde Sonne geschoom un se brasslde ne mehr ganz so orbormungslos off mich niedor. Hior war och die eenzsche Schdelle off dor ganzn Heeh, wo ich ma off Menschn draf Es schwangen sich zwee Inschdalladschons-Muggl (odor rebariordn die dordn was?) an dem Obschegd in lufdschor Heehe drumrum. Ich weeß gor ne, ob die mich üborhaubd bemergd haddn - mich schderdn se off scheedn Fall ne bei dor Informadschonsabfraache. Ogee, so nahe hädde mor villei dafür gor ne ranloofn müssn, abor mor will schah alles im Bligg hamm un och nüsch üborsehn un dadurch falsche Wariable zur Finalormiddlung eibaun. Hior hadde ich zwar genau gezähld, zweiflde allordings zu erschd an "D", als mir der Dscheggor zu mein beraachnedn Finalgoordinadn ne graduliorn wolld  

Feinl: Diese edwas verschachdlde un umfangreischore Raachnung nahm ich dann allordings erschd in einischor Endfernung, wo mich die Windrad-Muggl wirglich ne mehr sehn konndn vor. Un sie brachde ne den gewünschdn Orfolch Nach einichn Hin-un-her-geschiebe der Wariablen un mehrfachn Fehlraachnungen war der Dscheggor immor noch ne grien un ich bemiehde, wie so ofd am heidschn Dooch, mein Delefondschogor. Diesor nannde mir Goordinadn un Wariablen, die mich zum Ziel führn solldn. Allordings wurde och damid dor Dscheggor ne grien Hm, was schdimmd denn hior ne. Ich hädd izze zwar zum Deesl dingln könn - denn laach och scheen offn Riggweesch - abor der rode Dscheggor ließ mir keene Ruhe. So schdellde ich mich middn in dn Wald un begann zu brobiorn un erneud zu Raachnen un den Dscheggor zu gwäln Das MUSS doch gehn Dschah, hädde es an diesor Schdelle keen Dscheggor gegeem, hädde mor hior gudd ne vierdl Schdund schborn könn un wär mid den orhaldnen Informadschon eefach durchgeloofn, abor der Berfegdschonisd, der schdidd eem un brobiord un machd sich ne Bladde, was hior ne schdimmd. Also "B" hadde ich am Ende für den Dscheggor ordndlich gorrigiord un dies och glei meim Delefondschogor noch geordned durchgegeem (das der keene weidren falschn Infos rausgibd ), machde die BäHö-Runde noch zu Ende (soweid das ging) un schdeuorde abschließnd die miehseelich ormiddldn Finalgoordinadn an.
Hm, die laachn schah och im Nirschndwo, was mir allordings erschd gloor wurde, als ich mich erneud durch medorhohes Geschdrübb un Unnorholz gämbfn mussde. Ledzdlich schdellde ich mir och die Fraache, worum ich mir mid der Finalberaachnung un dem Dscheggor so ne Miehe gemachd hadde, denn hior im Diggichd half mir das 0 weidor Schon angenervd von Unnorholzsuche vorangegangnor Dosn, wolld mir hior schnell dor Geduldsfadn reißn un middlorweile hadde ich och irschndwie die Oriendierung hior im Geschdrübb verlorn, da sah ich dann doch das Deesl Nich wirglich gedarnd, abor dank undurchdringlichm Umfeld un hobsndn Goordinadn drodzdem gudd verschdeggd. Soll das wirglich so gedachd sein? Eefach nur zwee Schdeenln off dem Deesl? Ich bin kee Bessorverschdeggor un hab's deshalb nach meinor Unnorschrifd im Gäsdebischl och widdor so hinnorlassn, da sich hior ins Diggichd wahrschenlich eh kee Muggl verirrn wird. Die ledzde Hürde, widdor nen Weesch zerigge zum Weesch zu findn, wurde och nch gemeisdord un dann verließ ich abor wirglich die Heehe, die mich einiches an Nervn un görborlischor Gondidschon gegosded hadde Bei gefühld 50°C im Schaddn is die BäHö-Runde echd ne zu embfehln un diese Runde hior is och ziemlich ausgedehnd un raachnfreudich für solsche Dembradurn - abor da bin ich selbor schuld! Was verlasse ich och das gudd gegühlde Gäschmobil

Besdn Dank, liebor scheiby, für's Leeschn un vor allm gohrelange Bfleeschn diesor Bixx (och wenn se schlaachd gedarnd war Mor find ne mehr ofd so alde Dosn, daher war es mir ne besondre Ehre, diese Runde zu absolwiorn. Allordings sälldsde dir Schdadschon 2 wirglich ma anschaun un ewenduell ändorn odor ma freihaun Da is das Zähln echd langsam zum Gliggsschbiel gewordn (reeschd sich abor wahrscheinlich och nur dor Berfegdschonisd drübor off ).
Liem Gruß ausm fern Rußkams im weid weenschor scheen Sagsnland - an Brandnbuirch kommd eem nüschd nan