мы говорим по-русски

Heide schdand enn Ausfluch mid Fonzi an. Da Luzi in diesor Ack schon alles had un an OC-Gäschs och ne indressiord is, nudzde ich heide die Geleeschnheed mid eemfalls neddor un gombedendor Gesellschafd diesbezüschlich die Geeschnd im Schdrieschisdool ma offzuräum

Da mir fier die OC's noch bis Mochau wolldn, warder Durschmarsch durch Roßwein eeschndlich unumgänglich  Un wie's dor Zufall will, hadde Freund H.E.R.A. hior och widdor boor neue OC's "geschmissn".

Also ausgedehndor zwischnschdobb in Roßwein!

Erschde Haldebungd am Russnfriedhof (had mir das mei Guugl risch ieborsedzd? ). Un es bod sich uns enn (irschndwie) draurischor Anbligg, der uns och sehr nachdenglich schdimmde...

ALSO WENN DAS DOR ERICH SEHN KÖNNDE  WIE MIR MIBBM ANDENGN AN UNSRE RUSSSCHN FREUNDE UMGEHN  Der däd uns de Ohrn langziehn  Ich finds immor och n Schdiggweid draurich, wenn enn Friedhof so vergessn wird. Och wenn de Russn izze ne mehr unsre befohlnen Freunde sinn...

Abor zerigge zur geschdelldn Offgabe dieses Wirduelln:

Ich selbor bin ne in den Genuss des Orlerns diwersor Russischgenndnisse gekomm un ich war schon häbbie, daß mir Guugl wengsdns die Offgabe orglärn konnd. ... Dachd ich zumindesd... Wer konnd denn wissn, das sich H.E.R.A. hior "was ganz Besondres" had eefalln lassn. Ne Russischieborsedzung is eem nich glei ne Russischieborsedzung un off die Idee, das Fonzi nochma gwerlesn zu lassn, bin ich gor ne erschd gekomm, denn Guugl had doch was brauchbores ausgeschbugd un so konnd ich doch och viel bessor mid mein nich vorhandnen Russischkenndnissn brahln. Doch genau DAS ließ uns vor Ord in de Irre loofn - Hochmud kommd eem vor dem Fall  Vor Ord wurde machdn mir abor och so aus dem D3,5 enn D6  Da war das findn des befohlnen Basswordes enn Broblem, denn ich verdraude immor noch blind dem eemfalls irregeloofnen Guugl un landede somid in dor falschn Zeile  Fier de Ieborsedzung vor Ord war dann doch mein "russischschbrachischor" Freund Fonzi zuschdändsch  Der brachde die Ieborsedzung wengsdns off den Schdand, den H.E.R.A. eeschndlich vorausgesedzd hadde, was ich abor ne ahn konnd mid mein rudimendärn Russchwissn. Ins "Reine" brachde es dann wedor Fonzi, noch ich mid meim draachborn Guugl  Enn echd fieses Ding, was sich der H.E.R.A. da ausgedachd had  Denn wie grisch isch nu die Hüroglüfn ins Händie un zu Guugl??? Da fiehld mor sich als russischschbrachich un deschnisch undalendiordor Mensch n bissl benachdeilichd, um nich zu saahn disgriminiord  

Abor nachdem mir uns sehr reichlich mid der Maderie befassd haddn (och zu heeme mid hochleisdschor Dechnig) konnde och diese Nuss gegnaggd wern - mor muss eem nur Leidln kenn, die Leidln... 

... dachde ich zumindesd... Abor eescha, wie ich es dem Log weißmachn wolld - der wolld mei Bassword eefach ne fressn. Verzweifld delefoniorde ich dem Ounor hinnorher. Diesor verschdand erschd gor ne mei Broblem un was ich da von "dein Leiden" fasslde, bis bei ihm der groschn fiel un er mir dann endgüldich de Oochn öffnede. Nee nee nee du, langsam is der H.E.R.A. nich mehr mein Freund - was der sich immor fier fiese Sachn eifalln lässd un dann immor noch behaubd "hab doch exdra was Leichdes genomm" ... Ich weeß nich, wieor immor off so n schmales Bredd kommd? DAs HIOR IS DOCH LOGGOR ENN D5+5  Das wird izze die äldre Generadschon annorsch sehn, abor fier alle Ost-/Wesdkinnor dürfde diese D-Werdungseischdufung reel sein. In diesm Sinne, euch alln Wendekinnorn da draußn - VIEL GLIGG!

Besdn Dank, mei Liebor, fier's Leeschn dieses Wirduelln, der mir wirglich alles abverlangd had un in Zugunfd ma bissl mehr Gameradschafd zu dein benachdeilichdn Midschdreidorn bidde  Besondren Dank  och fier deine fehloranalüse un Hilfe 
Liem Gruß ausm fern Rußkams!