Park am Benedektinerkloster

& 841 & 14:15 - 15:33

Das Weddor war heid herrlich, abor Fonzi wolld ne offs Rad??? Nanu? Wadd da los??? Der wird doch ne edwa seim Radl abschwörn un nu doch zum Geogäschor wärn?
Ganz sischor ne, abor er war heid für ne Runde Dosn-suchn-zuguggn un so machdn mir die Geeschnd um Wegslbuirch unsischor, denn da gab es noch einiches hinnor Luzi herzugäschn...

Middlorweile haddn mir Wegslbuirch mid unsorm Haubdziel - diesm Muldi hior - orreichd. Doch bevor's lodgidd, erschdema enn Eis

Sdäidsch 1: ...un das brauchdn mir och, sowohl zum moralischn Offbau, als och zum Drosd Denn es haborde schon an dor erschdn Informadschonsfindung Es gab zwar an besaachdor Schdelle nen nam, abor keen Nam dazu. Guugl schbuggde was aus, was abor ne bassn dad, un alle Gordn, die mir offrufn konndn, machdn endwedor zu diesor Logäischn gor keene Aussaache odor zich verschiedne Angaam, die abor ne zum gewünschdn Ziel führdn Ledzdlich hammor's so gemachd, wie alle annren och -> riggraachnen Beim Durschlesn von Logs, die schon aaaaaaaaaainiche Gohre zerigg lieschn, is schon von diesm Broblem zu lesn... Kammor da ne ma s Lisding ändorn??? Is och enn Ding, sich eefach off diesor Lösungswariande auszuruhn
Die Agdschon glei am Anfang brachde glei das rische Maß Frusd, daß mir uns ehrlich üborleeschdn üborhaubd weidorzumachn. Abor mor raffd sich hald off, wenn mor so nen gelm Bungd von dor Gorde hamm will...

Sdäidsch 2: ...es ging schah drodzdem irschndwie weidor... Un mir fandn den Gräudorgordn. Dordn och das endschbreschnde Obschegd. Nachdem die nägsde Info nu unbroblemadisch offgenomm wordn war, ging es erschdema off Schdreifzuuch durch den Gordn - war sehr indressand.

Sdäidsch 3: Nu wähldn mir den Weesch doch edwas sehr umschdändlich, weil so ne Gorde eem nu ma nur zweedimensschonal is Verbundn mid einichn Heehnmedorn/Drebbn kamndn mir edwas ins Schwidzn. Vor Ord ne sehr anschbreschnde Logäischn, bei der uns allordings Bänge och ganz gudd gefalln häddn Naja, verschnaufdn mir hald im Schdehn un zähldn durch. Schon ging's weidor - villei findn mir schah hior im Barg (in den es nu anscheind ging) noch enn lauschisches Blädzl zum Ausruhn...

Sdäidsch 4: Off den doch edwas ausgedehndoren Weesch durch den Barg üborleeschde ich schon die ganze Zeid grambfhafd, welche Berson denn hior im Barg enn Dengmal gesedzd gegrischd hamm könnd. Das das schah enn Glosdorbarg is, hadde ich dabei völlich ausm Ooche verlorn un war übor die Schdadue am Zielbungd erschd edwas üborraschd Ledzlich machd'se Sinn och wenn ich ne genau weeß, wen die Benedegdinor so risch anbedn Die Ormidlung der hior gefraachdn Goordinade war in so fern raachd eefach, da der Name mehrfach zu findn war. Mir hädde sich wahrscheinlich sonsd die Fraache geschdelld "den eefachn Nam odor den volln un wenn den volln, wie is der eeschndlich???" So wurde es mir da schon eefach gemachd

Sdäidsch 5: An diesor Logäischn warn mir schon offn Weesch zur #4 vorbeigekomm un haddn den och schon neugiersch beäugd. Nu widdor hior, konndn mir uns nu voll un ganz off die geschdellde Offgabe gonzendriorn (den Resd haddn mir vornz schon eigehnd schdudiord ). Liebor zweema gezähld, och wenn mor da nen Drehrumbum grischd, abor beim Zähln vorschwimmds eem schah gladdwech vor dn Oochn - da häld dobbld bessor Ich deng abor, daß mir hior drodz allor Wiedrichkeedn das rische Orgebnis rausgegrischd hamm

Sdäidsch 6: Or, endlich. Enn lauschisches Flaggl zum Ausruhn - genau off DAS haddn mir die ganze Zeid geword. Hior sank Fonzi glei niedor, während ich noch mid der Wariablenbeschdimmung beschäffdsch war. Dies gelang hior abor och ohne Brobleme un ich sedzde mich zur Finalbeschdimmung och niedor. Da isses doch och ne schlimm, wenn diese edwas längor dauorn dud

Feinl: Die ledzdn Goordinadn vergombleddiordn die Runde dann berfegd offn Riggweesch zum Audo. un führdn uns nochma scheen durschn Barg. Vor Ord wolld ich erschd de Hände üborn Gobb zamschlaahn, da es hior schah zich Verschdeggmeeschlichkeedn gab Un meine Dechnig ließ mich anfangs och annor völlich falschn Schdelle suchn Da hadde ich eeschndlich von Anfang an doch die rische Richdung im Bligg, abor das had mor dann eem davon, wenn mor dem neumodschn Dechniggram verdraud un ne seim Gäschorinsdingd Da war Fonzi edwas unabhängschor un schdrolschde off begwemoren Weeschn un ne wie ich, im Unnorholz. Damid schdandn seine Finde-Schangsn von Anfang an bessor un nach nemma allzu langor Zeid heerde ich "kommsde ma?" NADIERLICH! Hm, war wirglich ne so schwer zu findn un mor musssch wunnorn, daß die Bixx hior schon so lange aushäld, ohne schdändich von Muggl wechgefundn zu wern Also eeschndlich für den geübdn Gäschor och kee Broblem middor Dosnfindung, wenn mor denn an dor rischn Logäischn suchd un ne blind un widdor bessren Wissns dor verwirrdn Dechnig verdraud

Abschließnd bleibd mir nur noch Danke zu saahn, wie immor für's Leeschn un Pfleeschn der Bixx un für die scheene Führung durch den Barg, mid all sein Heileids, die mor so wahrscheinlich in seinor Gänze gor ne alle zu fassn grischd. Allordings möchd ich doch nochma die erschde Schdadschon bemängln, die leidor nen Frusdfagdor schaffd, der hior echd ne Nod dud un nen unneedschn Schaddn off die Runde wirfd
Liem Gruß ausm fern Rußkams!