Der Schatz unter der Maylust

? 915 ? 14:49 - 15:11

Da ich langsam den Laachorgollor grisch, ging es heide glei widdor off Dour - gabudde Hand hin odor her. Diesma ging es mid Luzi off Agse un wie immor in diesor Gonsdeladschon wurde Middlsagsn unsischor gemachd
Dabei schdand heide die Geeschnd um Glosdorbuch offn Blan, da haddn mir ledzdns schon gewildord un die Agg fier sehr hübsch befundn. Nu wolldn mir noch mehr sehn!

Nach der riesen Runde in Wendischain nahmndn mir uns och noch de Maylusd vor! Un wenn mor uns schon von dor krassn Herde hiorherloggn lassn, nemmor nadierlich den Schadz UNNOR dor Maylusd och noch mid

Drinniedeil: Ich geb zu, ich hab mir hior nemma ansadzweise Gedangn zu dem Dhema gemachd, da ich dachde "ach, issn Bonus - glärd sich am Ende der Haubdrunde" Doch weid gefehld, was mor och hädde ewenduell schlussfolschorn könn, wenn mor sich orleene schon die Orscheinungsdadn angesehn hädde. Abor sowas had schah manschma och nüschd zu saachn...
Abor villei die deudlich geringoren Funde, geeschniebor der Haubdrunde? Ich gloob, da haddn viele mein Gedangngang un ohne Luzis Geisdesblidz bei dor finaln Ormiddlung des Haubdgäschs, wär wo och diesor Fund heide nüschd gewordn. Nich ansadzweise, daß die Info zu diesor Bixx ne im Logbuch der Maylusd-Runde schdehn könnd...

Draußiedeil: Abor Gottseiddank is Luzi aus nem annren Holz geschnidzd, wie ich, odor had eem och eefach mehr Gohr offn Gäschorbuggl Da schdelld mor solsche Mudmaßung eem nich eefach so an An dor zehndn Schdadschon der Maylusdwandrung fruuchh sie dann doch ma nach dem Lisding des Bonusses... Un kam da off ganz verweeschne Ideen Ogee, wär ich nu ne droff gekomm un hädd ich so och ne organnd Se had da echd ne bliehnde Fandasie...

Sdäidsch 1: Also die Geschichde ma ganz neu offgerolld un der Idee von Luzi nachgegang. Ich wolld es erschd ne gloom, abor alse dann dadsächlich enn Deesl hervorzauborde un das nägsde Gordndeil bräsendiorde UUUUUUUNGLAUBLICH Da schdeggd die Frau doch in den Köbbn der Ounor - ich hädd aus der zeichnung so nüschd rausziehn könn Noch völlich bedäbbord folschde ich der Luzi weidor, denn sie schien offnsichdlich bei diesor Geschichde den Durchbligg zu hamm

Sdäidsch 2: Nu wurde das Deräng allordings schon edwas anschbruchsvollor un hadde ich in Deiln der Haubdrunde schon gegloobd, daß die Weeschfiehrung ganz scheen Holla is, zu wurde hior nochma enn Gang hochgeschalldn. Abor gud, schdehn schah och 4 Schderne in dor T-Werdung (wenn ich geahnd hädd... ). Ich folschde Luzi daher in resbegdvolln Abschdand. Hadde zur Folsche, daß ich den schnelln Fund vonnor fasd verbassd hädde - als wüsde die Frau insdingdiv, wo die Bixx lieschd. Villei ne glei dor Erschde, abor wengsdns dor zweede sischorore Griff brachde och schon das nägsde Deesl zu Dooche Un dabei gab's hior loggor dausnde Wariandn, wo die Bixx hädd lieschn könn ich hädd widdor ewich gesuchd... Schnell deudede Luzi den nägsdn Schnibsl un ich war noch gor ne ganz ferdsch middor Fododogumendadschon, da war se och schon weidorgeschderzd

Sdäidsch 3: So hadde ich Miehe hior widdor Anschluss zu findn, denn von Luzi war schnell nüschd mehr zu sehn UN DAS, WO NUR SIE WEEß, WIE'S WEIDORGIDD Leichde Banig, als ich off mei Rufn hin och ne glei Andword grischde Abor se war wo schon zu sehr middor Suche beschäffdschd Als ich sie endlich endordeggde, ging mir och der Didl des Gäschs off ERNSDHAFD? Na obsch das hingrisch??? Abor Luzi digdiorde mir von undn nen dann doch ne so gewaachdn Zugang. Manmanman, is gor ne so eefach mid lediordor Hand, wenn mor sich ne risch fesdhaldn kann un gleichzeidsch och noch fier die Buchfiehrung zuschdändsch is Abor ich fand Anschluss, mir abor erschdma die Bixx ne. Luzi durnde schon ganz scheen unnor dor Maylusd -ich begnüschde mich liebor mid schdaun un sinnfreie Anweisung zu geem, nadierlich von nem sischren Bungd aus (un als ob ich irschnd ne Ahnung hädde, was genau se off diesor hüroglüfischn Zeischnung organnd had )
Am Ende warn mir uns wengsdns einich, daß Luzi die Zeichnung wahrscheinlich doch ne risch gedeuded hadde, ich hadde se middlorweile eingehnd schdudiord un das mir wahrscheinlich doch noch ne an dem beschriemnen Bungd befindn - also weidor! Un um noch ne Biesche un noch borrma mehr im droggnen un rudschischn Laub fasd de Maylusd nunnor un schon fandn mir enn Gewägs, was villei doch ganz gud zur Beschreibung bassn könnd... Ei gugge, noch enn Gordnschnibsl ... mir haddn schon fasd ne mehr dran gegloobd un in diesm Momend hädd ich mir schon gewünschd, wengsdns n bissl mehr vonnor DschieBieEs-geschdeuordn Schnibslschaachd midzugrischn. Ich meen, diese Ord der Schadzsuche war och indressand un ma was ganz annres, abor das Deräng machde meinor bauchgeeschnd un meinor Hand schon bissl zu schaffn Das Adrenalin bulsde off scheedn Fall schonma Och ma enn Gefiehl zu leem

Feinl: Nu hädd ich boor Medor hinnor der ledzdn Schdadschon gedachd "nu gidds abor wirglich ne mehr weidor", abor Luzi zeischde mir da was annres - WIE SCHEEN; WENN MOR ZWEE FUNGDSCHIONIORNDE HÄNDE HAD Fier mich hingeeschn wurde es immor amndeuorlischor un ich fraachde mich immor mehr, worum mor solsche Agdschon mid fasd virdsch machd un nich als Kind ... Abor der Adrenalingigg drieb mich weidor voran un wenn mor schon soweid gekomm is, dann will mor och irschndwo sein Schdembl neidrüggn Allordings ließmich mei Händiegäb mich immor weidor zeriggefalln (naja, villei war ich och edwas ieborvorsüschdsch ), so kam ich enn ganzes Ende nach Luzi an der halsbreschorischn Finalgeeschnd an. Da glemmde sie schon im Felsn Aaaaaah, der Felsn frissd de Luzi Ach nee, se scheind nur das Finale gefundn zu hamm Se werglde abor ganz scheen un ich heerde se och fluuchn, gwasi in dn Berch nei Da bekommd doch der Ausschbruch "der Berg ruft" ne ganz annre Bedeudung
Bis ich sie dann orreichd hadde, hadde se dann die Schadzgisde doch noch befreid, ich konndor also nemma dabei assesdiorn Abor wirglich schigg, das Deil! Da schdembld mor doch gerne ab un had och gerne sei Leem risgiord Un da war es heide droggn... Will mir das hior ne nach nem Reeschnguss odor im Windor vorschdelln - da gidd mor mid Sischorheed ab un die T4-Werdung hald ich im Nachgang bedrachded och fasd fier unnordriem, abor mir hamm schon midgegrischd, daß die Leidln hior in der Geeschnd bissl annorsch droff sinn
Na scheednfalls hamm's unsre Schdembl och in dieses Gäsdebuch geschaffd un am Ende konnd Luzi das Gisdl och widdor in Ausgangsbossidschon bring, och wenn mid dem Sischorungsmechanismus was nich so risch zu schdimm scheind. Abor echd, brauchs den hior? Hiorher verirrd sich doch nur enn gabuddor Gäschor un selbsd von dene wern ne alle ieborleem
Abobo Ieborleem... Wie kommor nu zerigge?

Besdn Dank, liebe krasse Herde, fier diese edwas annre Schadzschaachd, wobei mir in dem een odor annren Momend ne Goordinade doch ganz lieb gewesn wär - doch so kam wirglich Schadzsuchorfiehling off Bei der Weeschfiehrung hab ich och das een odor annre Ma gezweifld, abor nur so kam och genuch Adrenalin in de Bludbahn un gab den ganz besondren Gigg Abor ihr seid wirglich n bissl sehr abgedrehd hior in der Geeschnd (un da seid ihr schah beschdimmd noch ne de schlimmsdn hior ). Ich fier mein Deil fand die ganze Agdschon schon sehr gewaachd un hädde mir das orleene wo nich zugedraud odor zumindesd geword, bis ich görborlich widdor bessor in Form gewesn wär, abor Luzi zooch een hior enorm mid. Ich war gwasi nur ausbremsndes Anhängsl bei diesor Agdschon un konnd nich wirglich was zu dem Ganzn beidraahn, abor ich fand die Agdschon indressand un nervngidzelich abgedrehd - deshalb (och wenn ich einiche ma gegloobd hab, ich werd's ne ieborleem ) gibbed fier den Schbass un die doll verschdeggde un deseinde Bixx den blaun Verdiensdordn. Enn normalor Mensch däd hior zwar nur mibbm Zeischefingor Greise neem dor Schdirn drehn, abor genau weeschn solschn abgedrehdn Dingorn gäschn mir doch, odor? Damid mor seine Grenzn och ma ausdesdn kann Ich geb zu, bei dem Riggweesch, den Luzi dann wählde, schdieß ich an eem diese un hädde DAS dann wirglich ne mid heilor Haud ieborschdandn, abor och offn "Sissie"-Riggweesch war es noch enn Orlebnis un ICH HAB ES IEBORLEBD! Deshalb wird mir diese Bixx och noch lange in Orinnrung bleim!
Liem Gruß ausm fern Rußkams!