Hier braut sich was zusammen! [WhereIGo]

§ 25 § 17.08.18 14:14 - 15:21 & heide 14:36

EEEEEEEEEEEEEEndlich Urloob Was hab ich dem schon endgeeschn gefiebord! Un nu war es widdor soweid - widdor ne ganze Woche Brandnbuirch, Brandnbuirch...
https://www.youtube.com/watch?v=uellmynA34U

• Ledzdor Tach: Och nöööööö, ich will nich hämm ganz-doll-draurich-bin Wieso vergidd eeschndlich ne Orbeedswoche nich so schnell, wie immor die Woche hior?
  Immorhin hab ich's offn ledzdn Tach noch geschaffd, asp_fan_cb zu nor gemeinsam Gäschdour zu ieborredn Mir wolldn noch ne Gleddoragdschon gemeinsam meisdorn un dann sollde er mir doch bidde noch mid mein Bleidn, Bech un Bann der ledzdn Tache helfn, damid ich ne ganz so viel Unorleedsches bis ins nägsde Gohr lieschn lass Dabei wurde also der gombledde Wesdn vor de Dorn von Goddbus durchschdreifd

Och von diesm wurde das Feinl noch mid angefohrn, das war mir vor zwee Tachn dann eefach ma zu weid wech un ich hädd mich gloobe durch's Zendrum och dodal verheddord - da isses schon bessor nen Ordsgundschn dabei zu hamm
Doch von vorn:

Sdäidsch 1: Der schdand fier diesn Tach (also vor zwee Tachn) mid felsnfesd off dor Agenda, denn Whäreigos mag ich dodal Die sinn enn MUSS, wenn mor schonma een von diesn seldnen Dingorn offs Radar grischd! Abor eeschndlich war ich noch off nor ganz annren Runde in Schdröbidz unnorweeschs un weil an diesm Tach so gor nüschd glabbn wolld, hadde ich die Orkenndnis gewonn, daßes wo bessor is, ne haufn Sachn off eema, sonnorn scheedes nachnannor in dor Dibbldabbldour zu absolwiorn. Doch off der Ack am Schdordbungd wolld dann gor nüschd mehr loofn. Hing mich bei dem een off, wolld gurz nen annorn noch midnemm (gwasi als Ausgleich) , bei dem ich mich abor schon in dor Vorbereidung verdan hadde un ledzdlich... ich schdand gefrusded in nem Meer von Menschn, die ich in diesor menge gor ne orworded hadde (die annorn Vororde von Goddbus sinn och ne so ieborrannd ). Ich war gurz vorm Nervngollabs un so war meine ledzde Nodleine, diesn Whäreigo zu schdordn. Schbrang och soford an un wolld mich anscheind n bissl aus dem Gedümml rausholn - subbi, binsch dabei
Allordings schdolborde ich dann, beim aus dor Sonne schiem, doch noch iebor die eene verhaune Bixx un bemergde och endlich die fehlnde Info fier die Runde, off der ich mich urschbrünglich befundn hadde un alles kam annorsch - ich driffdede erschdma widdor von dem Whäreigo ab un machde erschdma off der Muldirunde weidor schäm

Sdäidsch 2: Doch wie durch enn Wunnor greuzdn sich die zwee Rundn dann dochma un ich konnd schonma die erschde Zudad abholn. Allordings lodsde mich dann die nägsde Zudad in ne völlich gondräre Richdung un zu allm Ieborfluss widdor in das Menschgewühle hinei Ich endschloss mich dann doch erschdma den Muldi zu beendn... weidor-schäm

Sdäidsch 3: Doch irschndwann warn die ruhschn Gebiede in Schdröbidz abgegäschd un wenn ich mich den Resd des Taches ne langweiln wolld, mussd ich mich nu endlich ma meinor Andhrobofobie zu schdelln Dabei schien mir der Whäreigo als rodor Fadn an all den noch offnen Dosn vorbei, besdns geeischned zu sein. An dem konnd ich mich fesdgralln un langhangln. Gesaachd, gedan, ich schdeuorde die nägsde Zudadnschdadschon an. Dabei fieln mir noch die een odor annre Dose vor de Fiss un ledzdlich orreichde ich... widdor Menschnwuhling Naja, nüdzd schah nüschd - ab durch de Midde, denn annorsch kam ich ne in de Zone Wobei ich an diesor Schdelle am anmergn muss, das so enn Whäreigo enn wundorbores Dherabiemiddl is - sälld mor ma den Bsüschologn embfehln
Ich hadde was ich wollde un schderzde erschdma aus der Meude raus Als ich dann die nägsde Zudad off dor Gorde suchde glabbde mir erschdma de Ginnlade offn Bodn Nee ne? Nich in de Schdadt nei? An der Schdelle ieborleeschde ich, daßes enne Dose niemals werd sein kann, daß ich... Ich fuhr weidor

Sdäidsch 4: Nachm Innschdadtring begann mei Herz laudhals in dn Ohrn zu schlaahn un ich verlor völlich die Oriendierung. Mor sälld zwar annemm, daß mor sich mid enm Nawi besonnorsch in dor Großschdadt ne verloofn kann, abor wenn mor am Ende ma meine dräggingliensche angesehn had...
Na scheednfalls orreichde ich nach einichm ZigZag doch noch irschndwie die Zone. Hior konnd dor Buls och n bissl runnorfohrn, denn orschdaunlischorweise war hior weenschor los, als off den Schdrooßn von Schdröbidz Sa, nu habsch alles zam Un die nägsde Zone schien och gor ne soweid wech.

Sdäidsch 5: Bid hiorher had ich sogor den gürzesdn Weesch gefundn, ohne mich zu verfohrn
Der ledzde Resd wurde abgewiggld un es konnd zur Bräsendieborgabe gehn. Wie? Nee! Nich euor Ernst? Nich mid mir! N Gilomedor? Durch de Schdadt? Eh, ich bin mibbm Fahrrad da Wissd ihr, was die mid scheemandn mid Rad in dor Schdadt machn? Außordem find ich doch nie bis dahin? Ich hab doch izze schon zu dun, die boor Bloggs widdor aus dor Schdadt rauszukomm (un das is nich geloochn - ihr gloobd ne, wie verbeild mor bei nor Banigaddage sein kann Da hilfd och keen Nawi mehr Das kannsde blödzlich ne mehr lesn ). Off Grund diwersor Umschdände brach ich ab un verschob die "Geschengeieborgabe"...

Feinl: Von diesm draurichn Dribb orzählde ich heide asp_fan_cb un das ich noch keene Ahnung hab, wie ich dordn hin komm soll un nur hoff, daß mich mei Nawi, dann bei Abreise dordn vorbeifiehrn wird Er nahm sich enn Herz un schoffiorde mich durch de Großschdadt Selbsd nur beim Midfohrn hadde ich an dor zweedn Ambl schon völlich die Oriendierung verlorn Ich hoffe nu nur, daßor mich och wirglich an dor rischn Dose ausgesedzd had un ich im rischn Gäsdebuch drinne schdeh Vor Ord war dann reladiv enschbannd. Nirschnds enn Muggl zu sehn. So gidd Großschdadt also och? Worum is mir das ne off der ganzn Runde so gegang? Vor Ord schdach soford enn margandes Obschegd ins Ooche, was glei als erschdes unnorsuchd wurde un nadierlich och die Bixx beherrberschde. Das war simbl - dageeschn die Dour durch Schdröbidz un de Innschdadt... Mor saachd zwar "Konfrontationstherapie hilft", diese Meinung kann ich nach der Agdschon allordings ne beschdädschn

Abor danke, daßor's versuchd habd un nadierlich fier's Leeschn un Pfleeschn, ihr leim Rieloudor un palk-Beschengor. An sich enn sehr scheenor un subbor durchloofndor Whäreigo, wenn es mir nur die Weeschschdregge ne so vermiesd hädde Mid meim iPhone 6S lief alles subbor un haglde nich eema.
Liem Gruß ausm fern Rußkams im sonnichn Sagsn
https://www.youtube.com/watch?v=pzd6WL2tt84