Kleiner Bonus im Forstrevier Borstendorf

? 911 ? 16:53

Nachdem mir uns durch die ledzde Edabbe der "großn Fahrradtour" gegwäld haddn, was an diesm Dooch/Abschnidd eedeudsch ma bessor lief, als beim erschdn Anloof, war mehr vom Dooch iebrich, als mir bei Schdord angenomm haddn Da warn mir doch gud durchgekomm un haddn ab Vorfeinl och noch die RSB'lorin als Unnorschdüdzung mid dabei Liem Gruß gleima an diesor Schdelle!
Nu beschlossn mir, eefach noch bissl weidorzuradln, denn der von der Dour her geblande Riggweesch endschbravh nich ganz unsren Vorschdellung So beschlossn mir nochma in dn Rödhnbachor Wald zu gudschn, um dordn, die beim ledzdn Mo lieschn gelassnnenn "noch offnen Raachnung", zu begleichn

Als erschdes laach diesor Bonus zu weeß ich was an dor Weeschschdregge.

Drinniedeil: Da hadde ich widdorma gombledd versaachd Weil ich eem immor nur alles ieborfliesch un nüschd genau les Ich orzählde Luzi schon währnd unsres erschdn Schdreifzuchs durch diesn Wald die ganze Zeid was vom "Cottaschdeen" un das mir den findn müssdn, um uns zu diesor Bixx durchzubeiln Jaja... Cottaschdeen...
Da kann ich nur froh sein, daß ich so ne offmergsame Gäschgolleeschin hab, die mich och gud kenn dud un deshalb gerne ma hinnor mir her gondrolliorn dud
Ihr fiel off, daßes hior gor ne um nen Schdeen gidd un das mir die Schdelle des Beilbungds doch gud kenn Sie iebornahm daher zu heeme schonma die Beilung un bereidede das ganze vor

Draußiedeil: Heide nu hadde se die finale Schdelle fesd mid ins Nawi eigemeisld. Zwar wolldn mir erschdma die große Fahrraddour beendn un middn Gäschorgudschln in dn Rödhnbachor Wald zur besaachdn Beilschdelle umsedzn, abor als uns gloor war, wie die RSB'lor zum Bargbladz zerigge wolln, endschiedn mir uns, die Schdregge liebor off zwee Rädorn zu bewäldschn. War ledzdlich och ne bessor, abor im Momend wussdn mir das noch ne
Bis hiorher kamndn mir abor noch angenehm durch un die Weeschschdregge endbubbde sich als doch raachd idüllisch un nich annähornd so schlimm, wie der erschd geblande Riggweesch. Mundor gwadschnd un ibor E-Beigs fachsimblnd orreichdn mir die gudbekannde Schdelle Na gugge hädsch das gewussd, hädsch den doch schon vor Monadn off nor annren Runde mid machn könn
Abor gud, der Wald is schah och so scheen, da kammor och öfdorsch herkomm
Die finale Schdelle sidd abor von ma zu ma schlimmor aus. Von den liebevolln handwerglichn Baudn is gaum noch was iebrich Wieso machn Leide sowas? Keenorlei Achdung vor dem Dun un Machn Annror Dene geheern de Bfodn abgehagd
Nachdem die Laache vor Ord ausfiehrlich bewerded war, ging es an de Suche. da dor Embfang hior nich dor Besde is, dadn mir un mibbm Schboilorbild ziemlich schwer Erschd mibbm Ladn, dann mibbm Suchn. Da wärn mir doch ohne WörldWaaaaaidWäb fasd schnellor gewesn un häddn uns ma liebor nur off unsren Gäschorinsdingd verlassn
Abor das Deesl Gottseidank doch noch irschndwie gefundn Bloß gud, lieschd's weid genuch von den Baulichkeedn endfernd - so weid sinn die wandalisiorndn Muggl offnsichdlich noch ne gekomm...

Besdn Dank, mei Liebor, fier's Leeschn un Pfleeschn der Bixx un fier's erneude Hiorherfiehrn un Offzeischn der draurichn Laache vor Ord
Liem Gruß ausm fern Rußkams!